Matthew 15

A Vinara ne Huriki a Gare Hosi

(Markus 7:1-13)

1Na parava tara e huriki a Pariseo, a mari na vinara na lotu ri pea e Ierusalem ri valai ri gi masia e Isu. Ri nanea, 2“E huriki a murimuri vomu, i navai ri longotaro a vilo ne huriki a gare hosi? I uka ma ri loi taro a limane ria muga ni kani!”

3E Isu i koli, i ta maea, “Pali mua, i navai mu longotaro a vinara na Vure mu gu muri mai a vilo hosi? 4 ^aA Vure i vakuku maea, ‘Mu togo e kinane mua e tamane mua.’ I ta maea tabu, ‘E rei a viri i harogi e tamana e kinana, ni gi rabalaki.’

5“Pali mua mu taki ta a viri ge takia e tamana e kinana, ge ta maea, ‘A kinori ta ga habi marua vona, a habi pali na Vure.’ Mu takia i kamumu nahea ge togo e tamana e kinana.’ 6Na naro iea, mu longotaroa a nitana Vure, mu gu ramai kunana a narone mua. 7Mua e huriki a tabele rua! E Isaia i ta muholi na tahuna i taki virihi mua na nita propet i ta maea,

8 ^b “‘Re huriki nga, ri taki ta ri togo iau,
pali i uka ma ri ngaru muholi iau.
9Ri kavurike tavula iau;
ri tovo e huriki na vinara tavula na bakovi, ri takia ta a vinara na Vure.’”

A Naro Hale i Bele na Hatena Viri

(Markus 7:14-23)

10Muri e Isu i gale valai e huriki, i ta maea, “Mu talangaki valai, mu longokilalea a nitagu. 11 ^cA maki i dili na ngavana bakovi i uka ma i ratea ge katoki na matana Vure. A maki i ratea i katoki na matana Vure, a maki i pagitala na ngavana.”

12Muri e huriki a murimuri vona ri vakalongoa, ri ta maea, “E huriki a Pariseo ri longoa a nitamu, i madihi a hatene ria vona.”

13Pali e Isu i koli mule, i ta maea, “A maki lobo e Tata na Hunu i uka ma i varo, bara ni lipu tala. 14 ^dNaha ria. Ri ngaru ni vakasiri a dala ne huriki, pali ri manga a kepa. Pali a kepa, bara i toni ni tulia a kepa, rua varago bara ru boru puru na lovo.”

15Muri e Petrus i ta maea, “O tuveve poloa ne mia a pelegona nivakakika.”

16Lakea e Isu i taki ria, “Ra mua, i uka ma mu longokilala ma a nitagu? 17I kavakava. A maki i dili na ngavamu bara i puru na kavutumu, muri i pagitala na kakaimu. 18Pali a ngava i pagitala na ngavana viri i valai na hatena, i ratea i katoki. 19A maki hale nga ri pagitala na hatena bakovi: a niluhoi hale, a naro ni rabalaki a viri, a molenga, a panahoa, a marapusianga, a nipadimomo. 20A naro nga ri rata a bakovi i katoki na matana Vure. Pali a viri i uka ma i loi a limana muga ni kani, i uka ma i ratea ge katoki.”

A Ngatavine o Kenan

(Markus 7:24-30)

21Muri e Isu i pea a tanga iea, i lakea na tabeke ne Tair, e Sidon. 22A ngatavine o Kenan tara i made vonga. I valai ne Isu, i ta dagi, i ta maea, “Bakovi Dagi, hamone Davit, o dodo iau! E tugu a ngatavine i dili vona a hanitu, i ratapilea.”

23Pali e Isu i uka ma i taratotoa. Muri e huriki a murimuri vona ri taki torea, ri ta maea, “O tonoa a ngatavine iea ge vano. I gale vilihui ne teu.”

24 ^ePali e Isu i koli, i ta maea, “A Vure i rudu valai iau ga kori kunana a kabu ne Israel, ri manga a maka sipsip ri velu.”

25Pali a ngatavine i turume puru na ngalana, i ta maea, “Bakovi Dagi o tuhori iau!”

26E Isu i koli, i ta maea, “I uka ma i kamumu ni gi bole a maki ni kani ne huriki a koma, ni gi voro lakea na ligo.”

27A ngatavine i koli, i ta maea, “Bakovi Dagi, o ta muholi. Pali a ligo ranga ri kani poi a momona maki ni kani.”

28Lakea e Isu i koli, i ta maea, “Ngata­vine, o luhoi tora hateka iau! Ge bele manga a hini o ngarua ge bele.” I mavonga, e tuna ngatavine i tavaga mala­viriri kunana.

E Isu i Vakamahuri e Huriki

29Muri e Isu i malaga vonga, i laho na dahana Darilomu e Galili. Muri i sike na dahana lolo, i made puru. 30E huriki ala kupo ri valai vona, ri tuli valai vona e huriki a vaha hale, e huriki a kepa, e huriki a beu, e huriki a ngavarubu, turana e huriki ranga. Ri taparaki ria na ngalane Isu. Lakea i vakamahuri ria lobo. 31 ^fE huriki lobo ri turutu na tahuna ri matai e huriki a ngavarubu ri ta, e huriki a beu ri tavaga, e huriki a vaha hale ri laho tabu, e huriki a kepa ri matapara. Lakea ria lobo ri kavurikea a Vure ne Israel.

E Isu i Vakani Tabu e Huriki

(Markus 8:1-10)

32 ^gMuri e Isu i gale palupu e huriki a murimuri vona, i ta maea, “Iau a dodo e huriki nga. Ri made turagu na parava i tolu pali. I uka ma ri kani. Pali ngane a koi ni rudu hamule ria, ma ge vurea a matane ria na dala, a vuhuna ri vitolo.”

33E huriki a murimuri ri koli, ri ta maea, “Pali si gi bole vai a bret koea na tabeke i ngeki, ge kara e huriki nga? Ri ala kupo hateka.”

34Lakea e Isu i nana ria, “I riva bret mu tahoka?”

Ri koli, ri ta maea, “Mi tahoka a bret i polorua, a manu kiroko ranga.”

35Lakea i taki e huriki ri gi made puru na malala. 36Muri i bole a bret i polorua, a manu kiroko ranga, i kavurikea a Vure. I keve, i habi ne huriki a murimuri ri gi veru ne huriki. 37E huriki lobo ri kani, ri maru. Muri ri tahoni na kulopi i polorua a kalavana maki ni kani. 38E huriki a bakovi ri kani ri ala rangale va (4,000). A ngatavine, a koma i uka ma ni gi. 39Muri e Isu i rudu e huriki ri gi hamule lakea na tanga ne ria. I rike na aga ia, i lakea na tabeke ne Magadan.